CARTAS Á PRESIDENCIA

Ola,

Eu falaba o último día, co grupo de persoas que nos xuntamos para “Falar de Educación” en Arteixo e en Betanzos, dunha cuestión que deixo a consideración, unha vez máis:

De que serve facer ofertas de accións formativas coas familias se non teñen conciencia desa necesidade, en xeral?

Ser padre biolóxico, ser madre biolóxica é, na inmensa maioría das persoas, unha cuestión doada. Exercer, de maneira responsable, esa función é algo que nos parece que vén no “kit” das persoas, ao nacer, e que se traslada na herdanza duns individuos a outros. Rotundamente, non é así. O único que traemos no noso interno é o instinto de supervivencia da especie da mesma maneira ca outros animais. A diferenza é que nós temos que medrar en sabedoría para exercer as responsabilidades que nos tocan en cada momento e en calquera eido: individual, familiar, laboral, social... Ter ansia permanente de saber, de saber ser, de saber facer e de saber convivir son ingredentes que deben formar parte da alimentación diaria familiar para saír, no só da ignorancia, senón tamén, para progresar de maneira constante como persoas, como familias, como pobo. Unha sociedade, en xeral, e unha comunidade, en particular, que viva nunha aldea, nunha vila, nunha cidade... non evoluciona cando non hai coñecemento, cando non existe o desexo de saber e isto ten que formar parte da conciencia persoal de cada quen, a cotío.

E se non existe tal xuízo, tal necesidade?

Haberá que facer campañas da importancia da familia na procura da educación coma as da Xefatura de Tráfico e que nos quiten puntos. A familia que se quede sen ningún, que faga o curso de sensibilización e reeducación para iniciar, de novo, a súa andaina, coma tal, nunha AFENPA (Academia de Formación Estatal de Nais e Pais). Poido dar máis alternativas. Hoxe quedo aquí.

José Luis González

Nesta nova entrada imos ir incluíndo escritos que as socias, socios  e colaboradores, nos vaian facendo chegar, a xeito da sección dos xornais na que tamén se recollen escritos dos lectores. En todo caso, aplicando os mesmos criterios de respecto e corrección que veñen definidos na netiqueta ao máis que chegaremos será á revisión lingüística en acordo co autor ou autora, antes da súa publicación.

-------------------------------------------------------------------------------------------------------------------------------

En esta nueva entrada, iremos incluyendo escritos que socias, socios y colaboradores nos vayan enviando, como en la sección de los periódicos en la que también se recogen escritos de los lectores. En todo caso, aplicando los mismos criterios de respeto y correción que vienen definidos en la netiqueta, como mucho interviniendo en la revisión lingüística de acuerdo con el autor o autora, antes de su publicación.