De volta do verán...

Xastamos de volta do verán. Por dicir algo. Seica en todas partes da pel de touro, e alen dos mares, nas illas de aquí e acola, tiveron o sol de compañeiro permanente.

Os que ficamos na terra ártabra, sabemos o que é por referencias.

E despois dun verán de alpedues económicos, convocatorias electorais con truco, fames lonxanas que vemos nas teles dos chiringuitos, guerras que aparecen e desaparecen, mortes infantis e fimininas sen sentido, visitas vaticanas con multitudinarias masas efervescentes, campeonatos con belisco clarificador,… imos arrincar o novo curso con recurtes seguros e folgas posibles.

Haberá que porse as pilas para afrontar o que se nos ven enriba. E retomar os camiños que iniciamos no anterior.

A economía restrictiva impón, aínda máis do que é común, o control do gasto, a adecuación dos presupostos e a loita impenitente contra os debedores sistemáticos. Parece que a Consellería tamén anda niso, e se eliminar prazas, unidades ou servizos, pechar comedores ou non ofrecer máis prestacións, son cousas coas que non podemos estar dacordo, que pensen en non permitir o acceso aos usuarios que non están ao dia nos pagos parécenos simplemente de recibo. Debedores. A todo isto, son uns copións.

Os ventos de renovación democrática que comezaron a soprar no 15M, que algúns poñen en dúbida, quizais porque non están ao tanto do que se está a facer a nivel local (asembleas temáticas, economía social, ecoloxía, accións reivindicativas, publicacións, blogs, hortas comunais,…), reclámannos que continuemos co noso propio proceso de renovación estatutaria cara a definir como queremos que sexa a Asociación nos vindeiros anos. Xa vedes, tamén empezamos antes, máis copións. E igual a buscar o que nos poidan ensinar estes grupos activos sobre o que se pode levar adiante cara o futuro.

E comezamos a andaina desta XD, en palabras de Camilo, falando de incrementar a densidade de información (cantidade e calidade) entre a directiva e todos os socios. Estamos traballando na mellora e crecemento do blog e, como moitos dos socios non teñen acceso regular á rede, na edición dunha chamádelle revista, boletín ou como vos pete, que poida chegar a todo o persoal, inclusive fora da asociación.

Para todo isto, e máis, imos seguir traballando, pero necesitamos tamén o voso apoio, colaboración e complicidade. Tentaremos con cada movemento de ficha gañar o interese de todas e incitarvos a que vos impliquedes e aportedes o voso grao de millo.

Temos ademáis un reto pendente. O que nos lanzou na convivencia de familias o Mestre Maior de establecer e desenvolver un proxecto de comunidade educativa, que lle de continuidade ao traballo de estes últimos anos en educación para nais e pais. Sería bo crear unha comisión ou grupo que comezara a traballar na elaboración de propostas neste senso.

Queremos seguir aprendendo. Entre nós, con vos e sobre todo con eles. Xa sabedes de quen falamos. Imos ser quen de aprender das nosas fillas, dos nosos fillos? Malo senon é asi. Son o presente, son o futuro.

Saúdos,

XD.